Тоқаев жаңа Мәдениет және ақпарат министріне бірқатар тапсырма берді

Президент Қасым-Жомарт Тоқаев Мәдениет және ақпарат министрі Арман Қырықбаевты қабылдап, ведомство жұмысының басым бағыттарын айқындады. Мемлекет басшысы министрге мәдениет, ақпарат саясаты, қоғамдық келісім және жастар салалары бойынша бірқатар нақты міндет жүктеді, деп хабарлады Ақорда.

Президент мәдениет пен креативті индустрияны одан әрі дамытуды, тарихи-мәдени мұраны сақтау және кеңінен насихаттау жұмыстарын күшейтуді тапсырды. Сондай-ақ Қазақстан мәдениетін халықаралық деңгейде дәріптеудің маңызын атап өтті.

Кездесуде мемлекеттік ақпараттық саясатқа ерекше назар аударылды. Тоқаев отандық ақпарат кеңістігін жандандырып, заманауи цифрлық тәуекелдерді ескере отырып, заң жобалау жұмысын жетілдіру қажет деп санайды.

Бұдан бөлек, Мемлекет басшысы қоғамдық келісімді нығайту жұмыстарын жүйелі түрде жалғастыруды және жастардың жасампаз әлеуетін жүзеге асыруына жағдай жасауды тапсырды.

Арман Қырықбаев 3 қыркүйекте Мәдениет және ақпарат министрі болып тағайындалған еді. Бұған дейін ол Президенттің ішкі саясат және коммуникациялар мәселелері жөніндегі көмекшісі қызметін атқарды.