ШҚО-да мыңдаған тұрғын еңбекпен қамтылып, жоспар мерзімінен бұрын асыра орындалды

Шығыс Қазақстан облысының әкімі Нұрымбет Сақтағанов қатысқан Үкіметтің кезекті мәжілісінде еңбек нарығын білікті мамандармен қамтамасыз ету және өндірістік саланы дамыту мәселелері кеңінен сөз болды. Бейінді министрліктер мен мемлекеттік орган басшылары өнеркәсіп, энергетика, газ бен өзге де өндірістік бағыттарды қажетті жұмысшы кадрлармен қамтудың ағымдағы жай-ауын ортаға салды. Сондай-ақ жиында оқу орындарының материалдық-техникалық мүмкіндіктерін артыру және заманауи еңбек нарығының сұранысына сай мамандар даярлау жүйесін оңтайландыру бойынша бірқатар ұсыныстар сарапқа салынды. Өңірде өнеркәсіп, құрылыс және логистика салалары қарқынды дамып жатқандықтан, бұл бастамалар Шығыс Қазақстан үшін аса маңызды стратегиялық маңызға ие. Жыл соңына дейін Өңірлік жұмыспен қамту картасы шеңберінде 17 440 азаматты жұмысқа орналастыру көзделген болса, 1 қыркүйектегі есеп бойынша 13 641 тұрғын (жылдық меженің 78 пайызы) еңбекке тартылып үлгерді, оның ішінде 9 976 адам тұрақты жұмыс орнын тапты деп хабарлайды Шығыс Қазақстан облысы әкімдігінің баспасөз қызметі.

Өңірде іске асырылып жатқан ірі инфрақұрылымдық жобаларға арнайы мамандар әзірлеу процесі де жоғары қарқынмен жүзеге асырылуда. Мысалы, Зайсан мен Катонқарағай аудандарында бой көтеріп жатқан жаңа әуежайлардың үздіксіз жұмысын қамтамасыз ету үшін сұранысқа ие бағыттар бойынша 46 маман арнайы оқыту курстарынан өтті. Бұдан бөлек, Мемлекет басшысының тапсырмасына сәйкес, жыл басынан бері облыста 5 270 жаңа жұмыс орны құрылды. Бастапқы бекітілген жоспар бойынша бұл көрсеткіш 4 142 өндірістік орынды құрауы тиіс еді, нәтижесінде тапсырма 127 пайызға асыра орындалып отыр.

Бүгінгі таңда Шғыс Қазақстан облысы бойынша Электрондық еңбек биржасында 7 540 бос жұмыс орны ашық тұр. Бос лауазымдардың басым бөлігі білім беру мен тәрбие, өндіріс, транспорт пен логистика, денсаулық сақтау, құрылыс және энергетика салаларына тиесілі. Бұл орайда сұранысқа ие техникалық және жұмысшы мамандарға ұсынылатын жоғары жалақы мөлшері аталған салаларға білікті кадрларды тартудың негізгі қозғаушы күшіне айналды.

Жеке кәсібін ашып, өз ісін бастағысы келетін азаматтарды мемлекеттік қолдау шаралары да қарқынды түрде жүргізіліп жатыр. Биыл Шығыс Қазақстанда әлеуметтік тұрғыдан осал санатқа жататын тұрғындарға 300 қайтарымсыз грант бөлу жоспарланған болатын. Қазірдің өзінде бірінші кезең қорытындысы бойынша жалпы сомасы 205 миллион теңгені құрайтын 119 грант өз иелерін тапты. Мұнымен қоса, облыста 440 жұмыссыз азаматты еңбек нарығында үлкен сұранысқа ие 79 мамандық бойынша қайта оқыту жоспарланып, бүгінге дейін 241 адам білім алуға жіберілсе, оның 156-сы тиісті даярлықты толық аяқтады.