Щучинскідегі дәмхана жарылысы: екі адам 7 жылға, бір адам 6 жылға сотталды

Ақмола облысының Бурабай аудандық соты Щучинск қаласындағы «Центр плова Loft» дәмханасында болған жарылысқа қатысты үкім шығарды. Сот дәмхана иесін және автогаз құю бекетінің директорын 7 жылға, газ баллондарын жеткізушіні 6 жылға бас бостандығынан айырды, деп хабарлады Kazinform.

Дәмхана иесі Қылмыстық кодекстің 292-бабының 3-бөлігі бойынша кінәлі деп танылды. Бұл бап өрт қауіпсіздігі талаптарын бұзу салдарынан абайсызда ауыр зардапқа, адам денсаулығына ауыр зиян келтіруге және екіден көп адамның өліміне әкеп соққан жағдайды қарастырады. Оған 7 жыл бас бостандығынан айыру жазасы тағайындалып, үш жыл бойы қоғамдық тамақтану саласында жұмыс істеуге тыйым салынды.

Автогаз құю бекетінің директоры Қылмыстық кодекстің 306-бабының 3-бөлігі бойынша, яғни тұтынушылардың өмірі мен денсаулығына қауіпсіздік талаптарына сай келмейтін қызмет көрсеткені үшін 7 жылға сотталды. Газ жеткізуші де осы бап бойынша кінәлі деп танылып, 6 жылға бас бостандығынан айырылды.

Сот жәбірленушілердің азаматтық талаптарын ішінара қанағаттандырды. Олардың әрқайсына 1 млн-нан 4 млн теңгеге дейін өтемақы өндіру туралы шешім шығарылды.

Сотталушылар соңғы сөзінде әртүрлі ұстаным білдірді. Дәмхана иесі өрт қауіпсіздігі талаптарының сақталмағанын мойындап, жәбірленушілерден кешірім сұрады. Ал газ құю бекетінің директоры өртке баллонның сыртқы әсерден жарылуы себеп болғанын айтып, өзін ақтауды сұраған.

Щучинскідегі «Центр плова Loft» дәмханасында газ жарылысы 26 ақпанда болған. Оқиға салдарынан жеті адам қаза тапты. 13 адам ауруханаға жеткізіліп, олардың сегізі медициналық көмек алғаннан кейін үйіне жіберілген. Кейін ауруханада тағы бес адам көз жұмды.

Төтенше жағдайлар министрлігінің мәліметінше, жарылысқа газ баллондарын пайдалану талаптарының бұзылуы себеп болған. Дәмхана иесі оқиғадан кейін ұсталған, ал сәуірде автогаз құю бекетінің директоры мен газ баллондарын жеткізуші де қамауға алынған.

Үкім әлі заңды күшіне енген жоқ.