Путин: Ресей мен Украина өзара келісуі керек

Ресей президенті Владимир Путин Украинадағы соғысты дипломатиялық жолмен тоқтатуға мүмкіндік бар деп санайтынын мәлімдеді. Оның айтуынша, ең алдымен Ресей мен Украина өзара келісімге келуі керек, ал басқа мемлекеттер бұл үдеріске қолдау көрсете алады. Бұл жөнінде DW жазды.

Путин бұл мәлімдемесін 3 қыркүйекте Шығыс экономикалық форумы аясында жасады.

«Ең алдымен Ресей мен Украина өзара келісуі керек. Ал қалған елдер қолдау көрсетуге және көмектесуге дайын. Бұл – дұрыс тәсіл. Осы мәселені реттеуге үлес қосуға тырысып жүргендердің бәріне ризамыз. Мүмкіндік бар ма? Меніңше, бар», – деді Путин.

Ол Мәскеу мен Киев арасында арнайы қызметтер желісі арқылы байланыс сақталып отырғанын да айтты. Алайда мұндай байланыстардың бейбіт келісімге қаншалық ықпал ететінін нақты айта алмады.

Путин Украина тарапынан Қара теңіздегі көлік кемелеріне жасалған шабуылдар мен Ресей әуе кеңістігінің қауіпсіздігіне қатысты Киев мәлімдемелері екіжақты келіссөз жүргізуді қиындатып отырғанын айтты.

Сол күні Украина президенті Владимир Зеленский де Ресеймен келіссөздің қайта басталу мүмкіндігі туралы мәлімдеді. Оның айтуынша, жуық арада АҚШ президентінің өкілдері Мәскеу мен Киевке барып, ықтимал бейбіт келісім мәселесін талқылайды.

«Алдын ала белгіленген күндер бар. АҚШ президентінің өкілдері Киевке келеді деп күтіп отырмыз. Олар Мәскеуде де, Киевте де кездесу болатынын растады», – деді Зеленский.

Ол Украина тарапы АҚШ командасымен тұрақты байланыста екенін айтты. Бұған дейін Зеленский Дональд Трамптың арнайы өкілдері Стив Уиткофф және Джаред Кушнермен телефон арқылы сөйлескен.

Келіссөздер мәселесі тамыз айының соңында АҚШ Орталық барлау басқармасының директоры Джон Рэтклиффтің Мәскеуге алдын ала жарияланбаған сапарынан кейін қайта көтеріле бастады. Axios мәліметінше, сапар барысында АҚШ, Ресей және Украина президенттерінің үшжақты кездесуін өткізу мүмкіндігі де талқыланған.

Кейін Дональд Трамп жақын арада үшжақты саммит өткізу жоспары барын жоққа шығарды.

«Мен кездесуді бейбіт келісім жасауға дайын болған кезде өткізгім келеді», – деді АҚШ президенті.