Мұғалімнің телефонына тыныштық бермейтін ата-аналарға Жұлдыз Сүлейменова үндеу жасады

Оқу-ағарту министрі Жұлдыз Сүлейменова педагогтер мен ата-аналарға арнайы ресми үндеу жолдады. Ведомство басшысы жұмыс уақыты аяқталғаннан кейін мұғалімдерге қоңырау шалып, мессенджерлерде шексіз хабарлама жазатын ата-аналардың әрекетіне қатысты министрліктің нақты позициясын білдірді.

Министрліктің мәлімдеуінше, бұл қадам қарым-қатынасты толық шектеуді көздемейді, бірақ өзара қарым-қатынасты қарапайым сыйластық пен этика шеңберіне келтіруді талап етеді.

Үндеуде жаңа регламентті енгізудің негізгі себептері мен мұғалімдердің күнделікті жүктемесі ашық айтылды:

• Орасан зор жүктеме: Педагог күніне орта есеппен 6 сабақ өткізіп, 150-ден астам баламен тікелей жұмыс істейді.
• Физикалық және психологиялық салмақ: Әр сабақта тәртіп сақтау, материалды түсіндіру, тапсырмаларды тексеру және әр балаға жеке ықылас бөлу қажет. Бұл үдеріс толығымен аяқта тұрып, жоғары эмоционалдық жауапкершілікпен өтеді.
• Сабақтан тыс міндеттер: Оқу процесі аяқталғаннан кейін мұғалім дәптерлерді тексеріп, келесі күннің сабақ жоспарын дайындауға міндетті.

Жұлдыз Сүлейменова қоғам тарапынан сабырлы, қуатты әрі кәсіби мамандарды көргіміз келсе, мұғалімдерге күш-жігерін калпына келтіруге мүмкіндік беру қажеттігін баса айтты. Жаңа ережелер мектеп пен отбасы арасын ажырату емес, мұғалімнің жеке уақыты мен демалыс құқығын қорғауға бағытталған.

Сонымен қатар баланың қауіпсіздігі мен денсаулығына қатысты төтенше әрі шұғыл жағдайлар туындағанда мұғалімдер әрдайым жедел әрекет етуге дайын. Оқу-ағарту министрлігі ата-аналарды жаңа регламентке түсіністікпен қарап, негізсіз себептермен педагогтердің мазасын алмауға шақырады.