«Мөлдір бұлақ» экологиялық акциясы: Астанада еріктілер бұлақ көздерін қоқыстан арылтты

Астана қаласында Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» тұжырымдамасы аясында «Мөлдір бұлақ» экологиялық акциясы өтті. Іс-шара барысында «Астана Тазалық» мекемесінің 50 қызметкері мен 50 ерікті күш біріктіріп, бұлақ көздерін ашу және айналаны қоқыстан тазарту жұмыстарын жүргізді.

Акция барысында қатысушылар 3 шақырым аумақты қамтып, су айдындарынан 5 500-ден астам темекі қалдығын, 57 дана шыны банканы, тіпті велосипед дөңгелегі мен пластик қалдықтарын шығарды. Ұйымдастырушылардың айтуынша, бұл бастаманың басты мақсаты – тек тазалық қана емес, қоғамда жауапкершілік пен экологиялық мәдениетті қалыптастыру.

«Мөлдір бұлақ» акциясы – тек тазалық жұмысы ғана емес, бұл – қоғамдағы жауапкершілік пен бірліктің айқын көрінісі. Мұндай шаралар арқылы тұрғындар табиғатты аялаудың маңызын терең түсініп, ортақ іске өз үлестерін қосуда», – деп атап өтті шараны ұйымдастырушылар.

Айта кету керек, соңғы жылдары елімізде еріктілер қозғалысы қарқынды дамып келеді. Ресми мәліметтерге сәйкес, бүгінде жүз мыңдаған азамат түрлі әлеуметтік және экологиялық жобаларға белсенді қатысуда. Мұндай акциялар «Таза Қазақстан» жалпыұлттық науқанының ажырамас бөлігіне айналып, қоршаған ортаны қорғауға бағытталған нақты іс-қимылдардың бірі ретінде жалғасын таппақ.