Миллиондап табыс табатын қазақстандықтар: Елімізде кімнің айлығы ең жоғары

Қазақстанда 1,1 миллион теңгеден астам жалақы алатын қызметкерлер саны шамамен 154 мың адамды құрады. Бұл зерттелген жалпы жұмысшылардың 4,6%-ы. Ұлттық статистика бюросы 3,4 миллион қызметкер арасында жүргізілген зерттеу нәтижелерін жариялады.

Деректерге сүйенсек, екінші тоқсанның қорытындысы бойынша елдегі орташа жалақы 486 мың теңгені құраған. Ал айына 1,5 миллион теңгеден астам табыс табатындар саны 73,7 мың адамға жеткен.

Елімізде ең кең тараған жалақы көлемі 300 мыңнан 500 мың теңгеге дейінгі аралық болып шықты. Ондай табысты 1,1 миллион адам, яғни жұмысшылардың 32%-ы алады. Сонымен қатар азаматтардың 42%-ының жалақысы 300 мың теңгеге жетпейтіні белгілі болды, ал 76 мың қызметкер (2,2%) 100 мың теңгеге де жетпейтін айлықпен шектелуде.

Меншік нысандары бойынша ең жоғары орташа жалақы шетелдік компанияларда тіркелген - 707 мың теңге. Ал мемлекеттік құрылымдарда бұл көрсеткіш 335,6 мың теңгені құрайды. Жастық санаттар арасында 35 пен 44 жас аралығындағы мамандар ең жоғары орташа табысқа (489,6 мың теңге) ие болып отыр.