АҚШ-қа тікелей рейс ашу үшін Air Astana қандай талаптарды орындауы керек

Қазақстан мен АҚШ арасында тікелей әуе қатынасын ашуға дайындық аясында Air Astana-ның авиациялық қауіпсіздік бағдарламасы тексеріліп, рейс басталғанға дейін әуежайдың қауіпсіздік деңгейіне бағалау жүргізіледі. Бұл мәселелер Астанада Қазақстанның авиациялық әкімшілігі мен АҚШ Көлік қауіпсіздігі әкімшілігі (TSA) өкілдерінің кездесуінде талқыланды.

Кездесу ИКАО-ның 2026 жылғы Авиациялық қауіпсіздік апталығы аясында өтті. АҚШ делегациясын TSA-ның авиация және халықаралық саясат мәселелері жөніндегі атқарушы директоры Эрик Ятар басқарды.

Тараптар Қазақстан мен АҚШ арасында тікелей әуе қатынасын ашуға қажетті қауіпсіздік талаптарына жеке тоқталды. Атап айтқанда, Air Astana-ның авиациялық қауіпсіздік бағдарламасын әзірлеу және оны TSA талаптарына сәйкестендіру мәселесі қаралды.

Америка тарапы тікелей рейстерді бастауға дейін атқарылуға тиіс негізгі жұмыстарды атады. Алдымен әуе компаниясының қауіпсіздік бағдарламасы қаралады. Бұдан бөлек, жолаушылар туралы деректерді беру жүйесінің TSA Secure Flight бағдарламасымен үйлесімділігі тексеріледі. Рейс ашылғанға дейін әуежайдағы авиациялық қауіпсіздік деңгейіне де бағалау жүргізілуге тиіс.

Бұл жұмыстарды АҚШ Көлік министрлігі мен Федералдық авиация әкімшілігінің рәсімдерімен қатар жүргізу қажеттігі айтылды. Кездесуде әуежайда бұған дейін жүргізілген алдын ала тексеру нәтижелері мен TSA ұсынымдарының орындалуына да назар аударылды.

Қазақстан тарапы АҚШ-тың авиациялық қауіпсіздік жүйесін зерттеуге қызығушылық білдірді. Осы мақсатта америкалық заңнама, қауіпсіздік талаптары және TSA-ның жұмыс тәжірибесімен танысу мүмкіндіктері талқыланды. АҚШ өкілдері тиісті нормативтік талаптар бойынша жүйеленген материалдар беруге дайын екенін жеткізді.

Тараптар жүк тасымалы мен жеткізу тізбектерінің қауіпсіздігі саласындағы ынтымақтастықты да жалғастырмақ.

Қазақстан мен АҚШ арасындағы тікелей рейстің нақты қашан ашылатыны хабарланған жоқ. Алдағы жұмыс қажетті қауіпсіздік рәсімдерін кезең-кезеңімен орындауға және екі ел арасында тікелей әуе қатынасын бастауға жағдай жасауға бағытталады.