«Кездесуді асыға күтемін»: Трамп Тоқаевқа құттықтау жолдады

АҚШ Президенті Дональд Трамп Қазақстан Президенті Қасым-Жомарт Тоқаевты Республика күнімен құттықтады. Құттықтау жеделхатында ол екі ел арасындағы қарым-қатынасқа тоқталып, желтоқсанда өтетін G20 саммиті аясында Тоқаевпен кездесуді күтетінін жеткізді.

Трамп кейінгі бір жылда Қазақстан мен АҚШ арасындағы серіктестік тереңдей түскенін атап өтті. Оның айтуынша, ынтымақтастық халықаралық бейбітшілік пен қауіпсіздіктен бастап, екі елге де тиімді коммерциялық келісімдерге дейінгі бағыттарды қамтиды.

«Кейінгі бір жыл ішінде серіктестігімізді тереңдете түскенімізге қуаныштымын. Бұл халықаралық бейбітшілік пен қауіпсіздік саласындағы ынтымақтастықтан бастап екі елге де пайдалы маңызды коммерциялық келісімдерге дейін қамтыды», – деп жазды АҚШ президенті.

Дональд Трамп АҚШ-тың 1991 жылы Қазақстанның тәуелсіздігін алғашқылардың бірі болып танығанын еске салып, Вашингтон Қазақстанның егемендігі мен аумақтық тұтастығын қолдайтынын мәлімдеді.

«Еліңіздің тәуелсіздігі мен егемендігін және аумақтық тұтастығын әрдайым қолдаймыз. Қазақстанның таңғаларлық экономикалық табыстарына америкалық компаниялар да зор үлес қосып келеді. Елдеріміз арасындағы берік достық ұзақ жылдарға жалғасатынына сенімдімін», – делінген жеделхатта.

Сөз соңында АҚШ президенті желтоқсанда өтетін G20 саммиті аясында Қазақстан Президентімен жүздесуді күтетінін айтты.

«Желтоқсан айында өтетін G20 саммиті аясындағы кездесуді асыға күтемін», – деп жазды Дональд Трамп.