Қазақстандық байлар қай елдерден жылжымайтын мүлік пен аралдар сатып алып жатыр

2025 жыл шетелден жылжымайтын мүлік сатып алатын қазақстандықтар арасында айқын жіктелу бар екенін көрсетті, деп хабарлайды Forbes. Сұраныстың ең жоғары өсімі екі клиенттік сегментте байқалды: бюджеті 100 мың еуроға дейінгі сатып алушылар және құны 1 млн еуродан асатын элиталық нысандарды таңдаушылар.

Салыстырмалы түрде «шағын бюджеті» бар қазақстандықтар Таиланд, Түркия және Индонезия нарықтарынан баспана алуға басымдық берсе, ауқатты азаматтар мүлде басқа стратегияны ұстанып, Еуропаның дәстүрлі әрі тұрақты елдерін таңдауда.

Сарапшылардың айтуынша, 1 млн еуродан жоғары ірі мәмілелерді талдау қазақстандық премиум-сатып алушылардың уақытпен сыналған юрисдикцияларға бет бұрғанын көрсетеді. Олар үшін шетелдегі жылжымайтын мүлік қысқамерзімді табыс көзі емес, имидждік капитал және болашақта жайлы өмір сүру мен көшуге арналған сенімді база болып саналады.

Миллиондық мәмілелер географиясы

Tranio брокерлік компаниясының деректеріне сәйкес, бір жыл бұрын қазақстандық инвесторлар Таиланд, БАӘ және Түркияға көбірек қызығушылық танытқан. Алайда 2025 жылы бұл бағыттар қымбат сегменттегі сатып алушылардың назарынан тыс қалды.

Биыл қазақстандықтардың 1 млн еуродан асатын ең ірі мәмілелері негізінен Еуропада шоғырланған. Капитал тартудың басты орталықтары – Франция, Ұлыбритания және Италия. Сонымен қатар Хорватия мен Грециядағы Адриатика және Жерорта теңізіндегі тұтас аралдарды сатып алуға қатысты сирек, бірақ көрсеткіштік сұраныстар тіркелген. Мұндай нысандардың бағасы 20 млн еуродан басталады.

Ал Оңтүстік-Шығыс Азия мен Парсы шығанағында 1 млн еуродан асатын мәмілелер жекелеген жағдайларда ғана кездеседі. Бұл, мысалы, Самуи, Банг-Тао немесе Карондағы виллалар, не болмаса БАӘ-дегі бірнеше пәтерден тұратын инвестициялық пакеттер болуы мүмкін.

Еуропалық бағыттардың басымдығы сатып алу мақсатына байланысты. Премиум-клиенттердің негізгі уәжі – демалыс пен көшу.

Сарапшылардың пікірінше, Еуропада үй сатып алу табыстылықтан гөрі жаһандық элитаға ену, жоғары әлеуметтік ортаға, үздік университеттерге және меншік құқығын қорғаудың сенімді жүйесіне қол жеткізуге бағытталған.

Ауқатты сатып алушылар үшін маңызды факторлар қатарында:

• Локацияның тарихи және мәдени мәртебесі;
• Ұзақ мерзімді, тіпті ұрпаққа жалғасатын интеграция мүмкіндігі;
• Дамыған көші-қон инфрақұрылымы (беделді мектептер мен клиникалар);
• Тілдік орта;

 Еуропадағы «миллиондық» нысандар

2025 жылы қазақстандық элитаның көшу мақсатындағы мәмілелерінің орташа құны шамамен 1,2 млн еуроны құрады. Бұл инвестициялық бағыттағы мәмілелерден 800 мың еуроға жоғары.

Францияда қазақстандықтардың сұранысы Лазур жағалауына және Париж аймағына (Иль-де-Франс) шоғырланған. Бұл – теңіз көрінісі бар апартаменттер, XIX ғасырдағы классикалық париждік үйлер. Мұндай нысандар мәртебесін жоғалтпай, мұраға беріледі әрі қаржы орталықтары мен элиталық білімге жақын орналасқан.

Ұлыбританияда негізгі таңдау – Лондон. Қала әлемдік қаржы орталығы ретінде құқықтық және саяси тұрақтылығымен ерекшеленеді. Marylebone, Kensington, Hyde және Regent’s Park маңындағы аудандар – балаларын үздік мектептерде оқытуды көздейтін отбасылар үшін тартымды.

Италияда сұраныс Гарда көлі мен Тоскана өңіріне бағытталған. Тас виллалар, қайта жаңғыртылған фермерлік үйлер, жүзімдіктері бар резиденциялар – мұның бәрі la bella vita стиліндегі тыныш әрі сәнді өмір салтымен байланысты.

Ал Хорватия мен Грециядан шағын арал іздейтін қазақстандықтар абсолютті қаржылық еркіндікті таңдағанын білдіреді. Мұндай сатып алулар – имидж бен жеке «жабық айлаққа» ие болудың белгісі.

Оңтүстік-Шығыс Азия курорттары мен Парсы шығанағындағы жасанды аралдар жоғары әлеуетті табыс ұсынады (жылына 6–13%), алайда тәуекел де жоғары. Ал капиталын қорғауды бірінші орынға қоятын элиталық инвесторлар үшін бұл нарықтар көбіне әртараптандырудың бір бөлігі ғана.

Соған қарамастан, ірі сомалар негізінен инфрақұрылымы қалыптасқан, сенімді аудандарға бағытталады. Мысалы, Dubai Marina, Downtown Dubai немесе Абу-Дабидегі Saadiyat және Yas аралдары. Бұл жобалар Aldar ірі девелоперінің шектеулі ұсыныстары қатарында.