Өскемендегі ерекше акция: 2,5 мың түлек қаланы жасыл желекке бөледі

Шығыс Қазақстан облысының орталығында «Таза Қазақстан» республикалық экологиялық бағдарламасы аясында кең ауқымды ағаш егу науқаны өтті. Игі шараға биылғы оқу жылының 2 400-ге жуық мектеп бітіруші түлектері қатысып, туған қаласының көркеюіне өз үлестерін қосты.

Экологиялық акция барысында облыс әкімі Нұрымбет Сақтағанов жастармен бірге жаңадан бой көтерген «Өскемен» аллеясына 2,5 мыңға жуық жас көшет отырғызды. Бұл бастама мектеп бітірушілер үшін тек қоршаған ортаны қорғау шарасы ғана емес, сонымен қатар алтын ұя мектебімен қоштасу қарсаңында туған жерінде өшпес із қалдырудың символдық белгісіне айналды.

Өңір басшысы өз сөзінде бұл іс-шараның тәрбиелік мәніне ерекше тоқталып өтті:

«Бұл бастама облыс орталығының экологиялық ахуалын жақсартып, ажарын ашып қана қоймайды, сонымен қатар өскелең ұрпақтың бойында туған өлкеге деген сүйіспеншілікті, табиғатқа деген жанашырлық пен жауапкершілік сезімін қалыптастырады. Уақыт өте келе бұл аллея түлектердің арнайы келіп, өздері еккен ағаштарының саясында демалатын, жылы естеліктерді жаңғыртатын қасиетті мекеніне айналатынына сенімдімін», — деді Нұрымбет Сақтағанов.

Айта кетейік, бүгінде әрбір түлектің қала картасында өзіндік «жасыл бағдары» бар. Мұндай акциялар алдағы уақытта да жалғасын тауып, облыс орталығының жасыл желекке айналуына септігін тигізбек.