Қазақстанда жылдық инфляция 10,6%-ға дейін баяулады: қандай тауарлар қымбаттады

Қазақстанда 2026 жылдың сәуір айында жылдық инфляция 10,6%-ға дейін баяулады, деп хабарлады Ұлттық статистика бюросы.

Айлық инфляция 0,8% болды. Азық-түлік тауарлары 0,7%-ға, азық-түлікке жатпайтын тауарлар мен ақылы қызметтер 0,9%-ға қымбаттаған.

Сәуірде жүзім 5,6%-ға, сары май мен карамель 1,2%-ға, картоп 0,8%-ға өсті. Сонымен қатар сүзбе, тәтті тоқаштар мен лимон бағасы да аздап қымбаттаған. Ал банан мен апельсин 3%-ға арзандап, көк өнімдер мен бұршақ бағасы да төмендеген.

Азық-түлікке жатпайтын тауарлар ішінде қолсағаттар 4%-ға, цемент 2,4%-ға, жеке гигиена құралдары 1,5%-ға өскен. Ал кір жуғыш машиналар, теледидарлар және кейбір дәрі-дәрмектер арзандаған.

Қызмет көрсету саласында тазалау қызметі 0,8%-ға, косметолог қызметі 0,7%-ға қымбаттады. Байланыс қызметтері мен заңгерлік қызметтердің бағасы да өскен.

Жылдық есепте азық-түлік 11,3%-ға, азық-түлікке жатпайтын тауарлар 11,7%-ға, ал қызметтер 8,9%-ға қымбаттаған. Кейбір өнім, соның ішінде қырыққабат, сарымсақ және қызылша арзандаған.