Өскемендегі зауытта жойқын жарылыс: ғимарат қирап, өрт шықты

Өскеменде «Қазцинк» кәсіпорны аумағында шаң ұстайтын құрылғы жарылып, өрт шықты, деп хабарлады Төтенше жағдайлар министрлігі.

Алғашқы мәлімет бойынша, жарылыстан кейін ашық жану тіркеліп, ғимарат ішінара опырылған. Оқиға орнына келген құтқарушылар жедел штаб құрып, аумақты барлау және зардап шеккендерді іздеу жұмыстарын бастаған.

Кейінгі ақпаратқа сәйкес, өрт оқшауланған. Құтқарушылар қазір қираған құрылымдарды бөлшектеу және жану ошақтарын толық сөндіру жұмыстарын жүргізіп жатыр.

Алдын ала дерек бойынша, төрт адам медициналық мекемеге жеткізілген. Олардың жағдайы нақтылануда.

Оқиға орнында 40 қызметкер мен 10 техника жұмылдырылған. Жедел штаб құрамына мемлекеттік органдар мен өзара іс-қимыл қызметтерінің өкілдері кірген. Өрттің нақты аумағы анықталып жатыр.