АҚШ Ормуз бұғазындағы операцияны уақытша тоқтатпақ

АҚШ президенті Дональд Трамп Ормуз бұғазында қалып қойған кемелерді алып жүру операциясы уақытша тоқтатылатынын мәлімдеді, деп хабарлады BBC-дің орыс қызметі.

Оның айтуынша, «Project Freedom» операциясы Иранмен ықтимал бейбіт келісім жасау мүмкіндігін бағалау үшін қысқа мерзімге кідіртіледі. Трамп бұл шешім Пәкістан мен өзге де елдердің өтініші бойынша қабылданғанын айтты.

АҚШ президенті операцияны тоқтату туралы мәлімдемесінде Иранмен келіссөздер бағытында «елеулі ілгерілеу» бар екенін атап өтті. Сонымен қатар Ормуз бұғазындағы блокада әзірге сақталатынын жеткізді.

Бұған дейін АҚШ мемлекеттік хатшысы Марко Рубио «Epic Rage» операциясы өз мақсатына жеткенін айтып, Вашингтон келесі кезең – «Project Freedom»-ға көшкенін мәлімдеген.

АҚШ Орталық қолбасшылығы операцияға эсминецтер, ұшақтар және 15 мың әскери қызметкер тартылатынын хабарлаған еді.

Соңғы күндері Ормуз бұғазындағы шабуылдар бітімнің бұзылуы мүмкін деген алаңдаушылық туғызды. Ұлыбритания теңіз сауда операциялары басқармасы белгісіз снаряд жүк кемесіне тигенін мәлімдеді. Ал Біріккен Араб Әмірліктері әуе қорғаныс жүйелері екінші күн қатарынан Иран зымырандары мен дрондарын қағып түсіріп жатқанын хабарлады.

Иран парламентінің спикері Мохаммед-Багер Ғалибаф АҚШ пен оның одақтастары бұғаздағы кеме қатынасы қауіпсіздігіне қатер төндірді деп мәлімдеді.