Алматы әуежайы терминалды су басқаны үшін жауапқа тартылды

Алматы халықаралық әуежайы терминалдың шатырынан су өтуіне байланысты әкімшілік жауапкершілікке тартылды, деп хабарлады Азаматтық авиация комитеті.

Ведомство мәліметінше, 3 мамыр күні болған оқиғадан кейін Көлік министрлігінің басшылығы әуежай әкімшілігі және құқық қорғау органдарымен бірлесіп шұғыл кеңес өткізген.

Тексеру нәтижесінде әуежай басшылығы техникалық мәселелерге жауапты аға вице-президент Мехмет Гюзельге тәртіптік жаза қолданған. Сонымен қатар әуежай жолаушылардан келтірілген қолайсыздықтар үшін кешірім сұраған.

Әуежай өкілдері анықталған кемшіліктерді жою жұмыстары күшейтілгенін мәлімдеді. Толық қалпына келтіру және су басу себептерін жою алты ай ішінде аяқталады деп жоспарланып отыр.

Еске салсақ, 3 мамыр күні нөсер жаңбыр салдарынан әуежайдың жаңа терминалының төбесінен су ағып, тексеру және паспорт бақылау аймақтарын басқан. Оқиғаның салдары шамамен жарты сағат ішінде жойылып, рейстер кестесіне әсер етпеген.