Қосшыға қарай LRT қашан жүреді: Жаңа бағыттың құрылысы басталды

Астанада Қосшы қаласы бағытына жеңіл рельсті көлік желісінің құрылысы басталды. Бұл жөнінде City Transportation Systems компаниясы хабарлады.

Компания мәліметінше, LRT жобасының екінші кезеңі аясында алғашқы тірекке бетон құю жұмыстары жүргізілген. Сонымен қатар елордадағы бетон зауытында эстакадалық бөлікке арналған алғашқы темірбетон арқалық дайындалған.

Жоба бойынша Қосшы бағытына 300-ден астам тірек орнату, 538 құрастырмалы темірбетон арқалық пен сегіз монолитті арқалықты монтаждау жоспарланып отыр.

Бұған дейін Астана әкімі Жеңіс Қасымбек Қосшы бағытына LRT желісі салынатынын мәлімдеген. Сондай-ақ қала орталығын ескі теміржол вокзалымен жалғайтын бағытты іске асыру көзделген.

Ал әуежайдан жаңа теміржол вокзалына дейінгі бірінші желінің негізгі құрылысы өткен жылы аяқталып, сынақ кезеңі басталған. Әкімнің айтуынша, бұл бағыт жақын уақытта іске қосылады. Жолақысы 200 теңге болады, ал пойыздар аралығы шамамен 4–5 минутты құрайды.