Айыппұлы барларға мемлекеттік қызмет көрсетілмейді: Қазақстанда жаңа шектеулер енгізілмек

ҚР Парламенті Мәжілісі бірінші оқылымда жол қозғалысы қауіпсіздігі, цифрландыру және жеке деректерді қорғау мәселелеріне бағытталған заң жобасын мақұлдады. Депутат Екатерина Смышляева таныстырған құжат салаға бірқатар технологиялық және реттеушілік өзгерістер енгізуді көздейді.

Заң жобасы аясында жедел медициналық көмек көліктері мен қоғамдық көліктерге жол қозғалысы ережелерін бұзу фактілерін автоматты түрде тіркейтін сертификатталған арнайы құрылғылар орнату жоспарлануда. Бұл шара құқық бұзушылықтарды анықтау ауқымын кеңейтіп, жолдардағы тәртіпті нығайтуға мүмкіндік береді. Сонымен қатар, жол қозғалысы саласында өтелмеген әкімшілік айыппұлдары бар азаматтарға мемлекеттік қызметтерді көрсетуді шектеу нормасы қарастырылған.

Жүргізушілерді даярлау сапасын арттыру мақсатында автомектептер үшін хабарландыру тәртібінен рұқсат беру тәртібіне көшу енгізіледі. Енді оқу ұйымдары қызметін бастау үшін:

• Тиісті материалдық-техникалық базаның;

• Мамандандырылған оқу алаңдары мен автодромдардың;

• Сапалы автопарк пен білікті нұсқаушылар құрамының болуын растауы тиіс.

Ішкі істер министрлігі талаптарға сай мекемелердің мемлекеттік реестрін жүргізеді. Реестрге енбеген ұйымдарға білім беру қызметімен айналысуға тыйым салынады.

Заңның екінші блогы жеке деректерді қорғауға арналған. Операторлар өңдейтін ақпарат көлемі мен тәуекел деңгейіне қарай (шағын, орта, ірі) жіктелетін болады. Негізгі жаңашылдықтар:

1. Скомпрометттелген деректер реестрі: Азаматтар өздерінің жеке мәліметтерінің ашық дереккөздерге тарап кеткен-кетпегенін тексере алады.

2. Маскирлеу және хеширлеу: Ашық жариялануы міндетті құжаттардағы (сот шешімдері, мемлекеттік сатып алулар) жеке ақпараттарды криптографиялық әдістермен қорғау міндеттеледі.

3. Шифрлау: Операторлар арасында мәлімет алмасу кезінде деректерді міндетті түрде шифрлау талабы қойылады.

Бұл заңнамалық түзетулер қоғамдық қауіпсіздікті қамтамасыз етуге және цифрлық ортадағы азаматтардың құқықтарын қорғау деңгейін арттыруға бағытталған.