БАӘ ОПЕК-тен шығады: Қазақстанға әсері қандай

Біріккен Араб Әмірліктері 1 мамырдан бастап ОПЕК және ОПЕК+ келісімдерінен шығатынын мәлімдеді. Сарапшылар бұл шешім әлемдік мұнай нарығына және баға саясатына әсер етуі мүмкін екенін айтады, деп хабарлады «31 арна».

Әмірліктер билігі бұл қадамды жаһандық нарықтағы өзгерістермен және энергия ресурстарына сұраныстың артуымен түсіндірген. Сонымен қатар ел мұнай жеткізілімдерінің тұрақтылығын сақтайтынын мәлімдеген. Сарапшылардың пікірінше, Таяу Шығыстағы шиеленіс аясында БАӘ экономикасы жанама шығындарға ұшырап, сауда, туризм және жұмыспен қамту салаларына әсер еткен.

Қаржы сарапшысы Расул Рысмамбетовтің айтуынша, Әмірліктер мұнай өндіруді жылдам арттыра алатын технологиялық мүмкіндігі жоғары елдердің бірі. Бұл өз кезегінде мұнай бағасына белгілі бір деңгейде қысым түсіруі мүмкін. Сонымен қатар мұндай қадам мұнай өндіруші елдер альянсындағы тәртіпке де әсер етуі ықтимал.

Энергетика саласының сарапшысы Әнуар Қожабеков БАӘ-нің бұған дейін өндіріс көлемін шектеуге мәжбүр болғанын атап өтті. Оның сөзінше, елдің өндірістік қуаты жоғары болғанымен, ОПЕК шектеулері бұл мүмкіндікті толық пайдалануға кедергі келтірген. Енді Әмірліктер жаңа нарықтарға шығып, өндіріс көлемін арттыруға ұмтылуы мүмкін.

Сарапшылар бұл жағдай Қазақстан үшін мұнай өндіру көлемін ұлғайтуға қосымша мүмкіндік беруі ықтимал екенін айтады. Алайда Энергетика министрлігі Қазақстан ОПЕК+ аясындағы өз міндеттемелерін өзгерту жоспарланбағанын мәлімдеді. 30 сәуірдегі мәлімет бойынша, Brent маркалы мұнайдың маусым айындағы фьючерстері 122,57 доллар деңгейіне дейін өскен.