Тоқаев Лавровты қабылдап, Путиннің Қазақстанға сапарын талқылады

Мемлекет басшысы Қасым-Жомарт Тоқаев Ресей Федерациясының Сыртқы істер министрі Сергей Лавровты қабылдады.

Кездесу барысында Президент Қазақстан мен Ресей арасындағы қарым-қатынас стратегиялық серіктестік және одақтастық рухында дамып келе жатқанын атап өтті. Сондай-ақ ол жоғары деңгейде қол жеткізілген уағдаластықтарды жүзеге асырудың және сауда-экономикалық, инвестициялық, мәдени-гуманитарлық байланыстарды нығайтудың маңызын айтты.

Тараптар Владимир Путиннің мамыр айының соңында Қазақстанға жоспарланған сапарына дайындық мәселесіне ерекше назар аударды. Қасым-Жомарт Тоқаев бұл сапарды екіжақты күн тәртібіндегі басты оқиғалардың бірі ретінде бағалады.

Сергей Лавров өз кезегінде Ресей президентінің сапарына дайындық барысы туралы ақпарат беріп, екі ел арасындағы көпжақты ынтымақтастық үкіметтер мен сыртқы істер министрліктері деңгейінде пысықталып жатқанын жеткізді.

Кездесу соңында тараптар халықаралық және аймақтық күн тәртібіндегі өзекті мәселелер бойынша пікір алмасты.