Қазақстан авиациясын америкалық маман басқаратын болды

«Қазақстанның авиациялық әкімшілігі» акционерлік қоғамының бас директоры қызметіне 4 мамырдан бастап Майкл Дэниел тағайындалды, деп хабарлады Көлік министрлігі.

Майкл Дэниел АҚШ-тағы Эмбри-Риддл аэроғарыш университетін бітірген. Оның азаматтық авиация саласында 40 жылдан астам тәжірибесі бар. Еңбек жолын АҚШ-тың Федералдық авиация басқармасында бастап, ұшу пайдалану инспекторы, әуе кемелерін сертификаттау маманы, ұшу қауіпсіздігі қызметінің жетекшісі және халықаралық бағдарламалар бойынша аға менеджер қызметтерін атқарған.

Ол Франкфурт, Нью-Йорк, Вашингтон, Сингапур және Бейжің қалаларындағы халықаралық кеңселерде жұмыс істеген. Әртүрлі жылдары көлік қауіпсіздігі мен әуе қатынасына қатысты халықаралық бастамаларды басқарған, сондай-ақ Халықаралық азаматтық авиация ұйымымен ынтымақтастық орнатқан.

Жаңа басшының негізгі міндеттерінің бірі – Қазақстан мен АҚШ арасында тікелей әуе рейстерін ашу. Бұған дейін бұл бағытты 2025 жылдың соңына дейін іске қосу жоспарланғанымен, әуе кемелерін жеткізу мерзімдерінің кешігуіне байланысты кейінге қалған.

Көлік министрлігінің мәліметінше, Қазақстаннан Нью-Йоркке тікелей рейстерді осы жылдың соңына дейін іске қосу мүмкіндігі қарастырылып жатыр.