GPA 3,33+ түлектерге конкурссыз жұмысқа орналасу мүмкіндігі бар

Мемлекеттік қызмет істері агенттігінің (МҚІА) төрағасы Дархан Жазықбай белсенді жастармен кездесіп, мемлекеттік қызметке кірудің жаңартылған мүмкіндіктері мен іріктеу жүйесіндегі өзгерістерді таныстырды. Кездесу барысында жас мамандардың мемлекеттік аппаратқа келуін ынталандыруға бағытталған нақты нәтижелер мен жеңілдіктер сөз болды.

Бүгінде оқу үлгерімі жоғары түлектер үшін мемлекеттік қызметке орналасудың оңтайландырылған тетігі жұмыс істеп тұр. МҚІА басшысының айтуынша, GPA көрсеткіші 3,33-тен жоғары болатын оқу орнының үздік түлектері аудандық және ауылдық деңгейдегі лауазымдарға конкурссыз қабылдана алады.

«Мемлекеттік қызметке талантты жастарды тарту – біздің басым бағытымыз. Қазіргі таңда бұл жеңілдікті пайдаланып, 788 жас маман конкурссыз жұмысқа орналасты. Біз іріктеу процесін барынша ашық әрі цифрлық форматқа көшіріп жатырмыз», – деді Дархан Жазықбай.

Агенттік төрағасы сондай-ақ Президенттік жастар кадр резерві мен өңірлік резервтердің тиімділігіне тоқталды. Бүгінде Президенттік резервтегі 450 азаматтың 77%-ы жауапты қызметтерге тағайындалған. Ал өңірлік резервке өткен 544 жастың 283-і қазіргі уақытта жұмысқа орналасып үлгерді. Сонымен қатар мемлекеттік қызметке іріктеу толықтай онлайн форматқа көшіп, іріктеу мерзімі 5–7 күнге дейін қысқартылған.