Комада жатқан науқастарға жәрдемақы қалай тағайындалады?

ҚР Еңбек және халықты әлеуметтік қорғау министрлігі комада жатқан азаматтарға мүгедектікті рәсімдеу және мемлекеттік төлемдерді тағайындау тәртібін жеңілдетуді көздейтін түзетулер әзірледі. Ведомствоның баспасөз қызметі хабарлағандай, жаңа ережелер медициналық-әлеуметтік сараптама жүргізу қағидаларына енгізілмек.

Ұсынылып отырған өзгерістер бойынша, енді науқастың жақын туыстары немесе жұбайы медициналық-әлеуметтік сараптамаға өтініш беру құқығына ие болады. Бұл қадам бұған дейін құжат рәсімдеу кезінде туындайтын заңдық және әкімшілік қиындықтарды жоюға бағытталған. Министрлік өкілдері жаңа тетіктің маңыздылығын былай деп түсіндірді:

«Енгізілетін өзгерістердің басты мақсаты – әкімшілік кедергілерді жою және азаматтардың мемлекет кепілдік берген әлеуметтік қолдау шараларына кедергісіз қол жеткізуін қамтамасыз ету. Бұл тәсіл комада жатқан азаматқа мүгедектік мәртебесін уақытылы белгілеуге және жәрдемақыны дер кезінде тағайындауға мүмкіндік береді».

Бұл нормалар төлемдерді рәсімдеу үдерісін барынша ашық әрі қолжетімді етіп, ауыр жағдайдағы азаматтардың отбасыларына көрсетілетін көмектің тиімділігін арттырмақ. Еңбек министрлігі қазіргі уақытта өмірлік қиын жағдайға тап болған азаматтарды әлеуметтік қолдаудың барлық тәсілдерін қайта қарап жатыр.