Әл-Фараби даңғылындағы жол апаты бойынша тергеу екі аптада аяқталады

Алматыдағы Әл-Фараби даңғылында болған адам өліміне әкелген жол апаты бойынша тергеу алдағы екі аптада аяқталады. Бұл жөнінде Ішкі істер министрінің орынбасары Санжар Әділов Сенат кулуарында мәлімдеді.

Оның айтуынша, қылмыстық іс аясында жүргізілген сараптамалардың басым бөлігі дайын. Қазіргі уақытта қажетті тергеу әрекеттері аяқталу сатысында, нәтижелері қосымша жарияланады.

Еске салсақ, үш адамның өмірін қиған жол апаты 21 наурызға қараған түні болған. Бейресми мәлімет бойынша, Zeekr маркалы көлік басқа автокөлікпен жарысқан болуы мүмкін. Апат фактісі бойынша қылмыстық іс қозғалды. Көлік жүргізушісі оқиға кезінде жеңіл дәрежедегі мас күйде болған. 7 сәуірде ол тергеу изоляторына қамалды.

Сонымен қатар полиция басшылығының қызметтік көлігі жүргізушісіне қатысты әрекетсіздік дерегі бойынша да қылмыстық іс қозғалған. Осы оқиғадан кейін ІІМ басшысы Алматы полиция департаменті басшысының орынбасарын, сондай-ақ әкімшілік полиция мен қоғамдық қауіпсіздік басқармаларының жетекшілерін қызметінен босатты.