Нұрай Серікбай ісінде жаңа күдіктілер жауапқа тартылуы мүмкін

Шымкентте қаза тапқан Нұрай Серікбай ісінде жаңа күдіктілер жауапқа тартылуы мүмкін. Бұл туралы Ішкі істер министрінің орынбасары Санжар Әділов мәлімдеді.

Оның айтуынша, қазіргі уақытта іс бойынша белсенді тергеу амалдары жүргізіліп жатыр. Тергеу барысында жәбірленуші тарап ұсынған деректер де тексерілуде.

«Жәбірленуші тараптан Нұрай күдіктінің үйіне жеткізілген кезде қасында болған адамдардың әрекетін тексеру туралы уәждер бар. Тергеу сатысында біз барлық мән-жайды толық қарап, әрбір деректі тексеруіміз қажет», – деді Әділов.

Еске салсақ, 11 қаңтарда Шымкентте Нұрай Серікбай пышақ жарақаттарынан көз жұмған. Бұған дейін күдіктінің оны қорқытып, аңдығаны туралы мәлімет тараған. Марқұмның ата-анасы полицияға арыз жазғанымен, қылмыстық іс дер кезінде тіркелмегені айтылған.

Осы оқиғадан кейін Президенттің тапсырмасымен құқық қорғау органдарының әрекеті тексеріліп, Шымкент қалалық полиция департаментінің бұрынғы басшысы қызметінен босатылған. Бірқатар қызметкерге қатысты салғырттық дерегі бойынша қылмыстық іс қозғалды.

Қылмыс адам өлтіру, некеге мәжбүрлеу және аңду фактілері бойынша тергеліп жатыр. Күдікті бұған дейін психикалық ауытқуға байланысты тексерілгенімен, есі дұрыс деп танылған.