Қырғызстанда Камшыбек Ташиевке екі бап бойынша айып тағылып, елден шығуға шектеу қойылды

Қырғызстанда Ұлттық мемлекеттік қауіпсіздік комитетінің бұрынғы төрағасы Камшыбек Ташиевке Қылмыстық кодекстің екі бабы бойынша айып тағылды. Бұл жөнінде оның адвокаты Икрамидин Айткулов «Азаттыққа» мәлімдеген.

Айыптар билікті күшпен басып алу немесе ұстап тұру әрекеті және қызметтік өкілеттігін асыра пайдалану баптарын қамтиды. Сот оған елден шығуға тыйым салу түріндегі бұлтартпау шарасын таңдаған.

29 сәуірде Ташиев өзіне қатысты қылмыстық іс қозғалғанын растады. Ол өзін кінәсіз санайтынын мәлімдеп, жақтастарын заң аясынан шықпауға шақырған.

БАҚ мәліметінше, іс «75 хат» деп аталатын үндеумен байланысты болуы мүмкін. Ақпанда 75 саясаткер мен қоғам қайраткері президентке мерзімінен бұрын сайлау өткізу туралы өтініш жолдаған. Кейін олардың бір бөлігі құжатпен толық таныспағанын айтқан.

Аталған іс бойынша бірнеше адам ұсталған, олардың қатарында бұрынғы жоғары лауазымды тұлғалар да бар. Бұл оқиғалар аясында Ташиев қызметінен босатылып, бірқатар саясаткер тергеуге шақырылған.