Қазақстанда неге мыңдаған кәсіпкер жұмысын тоқтатты: Министр нақты себептерін түсіндірді

Қазақстанда 2026 жылдың бірінші тоқсанында 207 мыңнан астам жеке кәсіпкер қызметін тоқтатты. Бұл туралы Премьер-Министрдің орынбасары – Ұлттық экономика министрі Серік Жұманғарин мәлімдеді.

Оның айтуынша, бұл көрсеткішті бағалауда базалық деңгей ескерілуі тиіс. 2024–2025 жылдардың алғашқы тоқсандарында орта есеппен 104 мың кәсіпкер жабылған. Қазіргі өсім шамамен қосымша 100 мың жабылумен байланысты. Министр бастапқыда бұл көрсеткіш 300 мыңға дейін жетуі мүмкін деп күтілгенін айтты.

Жабылған кәсіпкерлердің бір бөлігі қызмет түрін өзгерткен. Атап айтқанда, 39,2 мың кәсіпкер өзін-өзі жұмыспен қамтығандар санатына өткен, 11,8 мыңы басқа компанияларда басшылық қызмет атқарған, ал 94,2 мыңында 2025 жылы табыс болмаған.

Сонымен қатар елде жаңа бизнес субъектілерінің тіркелуі жалғасып жатыр. Бірінші тоқсанда 99 мыңнан астам салық төлеуші тіркелген. Олардың басым бөлігі – жеке кәсіпкерлер. Жалпы заңды тұлғалар саны 584 мыңнан асты, ал өзін-өзі жұмыспен қамтығандар саны 410 мыңнан жоғары.

Министр бұл үрдісті бизнестегі құрылымдық өзгерістермен байланыстырды. Оның сөзінше, нарықтан белсенділігі төмен кәсіпкерлер кетіп, бір бөлігі іріленіп заңды тұлғаға айналып жатыр, ал кейбірі қызметін өзін-өзі жұмыспен қамту режимінде жалғастыруда.

Сондай-ақ бірінші тоқсанда 62,5 мыңнан астам кәсіпорын қызметін уақытша тоқтатқан. Бұл көрсеткіш өткен жылдармен салыстырғанда артқанымен, министр оны экономикалық бейімделу процесінің бір бөлігі деп бағалады.