Жануарларға қатыгездік: айыппұл өсіп, жаза күшейтіледі

Қазақстанда жануарларға қатыгездік көрсеткені үшін жауапкершілікті күшейту ұсынылды. Бұл норма Мәжілісте қаралып жатқан заң жобасы аясында енгізілмек.

Құжатқа сәйкес, жануарларға қасақана ауырсыну келтіру, жарақаттау немесе өліміне әкеп соқтыру фактілері үшін әкімшілік жауапкершілік күшейтіледі. Мұндай құқық бұзушылықтар бойынша айыппұл көлемі бірнеше есеге ұлғайтылмақ.

Экология мәселелері және табиғат пайдалану комитетінің төрағасы Еділ Жаңбыршин бұл өзгерістер Мемлекет басшысының тапсырмасына байланысты енгізіліп отырғанын айтты.

«Мемлекет басшысы Қасым-Жомарт Тоқаев жануарларға қатыгездікпен қарау мәселесіне байланысты жауапкершілікті күшейту туралы тапсырма берген болатын. Осыған орай біз Қылмыстық кодекс пен Әкімшілік құқық бұзушылық туралы кодекске өзгерістер енгізуді ұсынып отырмыз», – деді депутат.

Оның айтуынша, қылмыстық жауапкершілік те қатаңдатылмақ.

«Егер жануарларға ауыр зиян келтірілсе, қамау мерзімін алты айға дейін арттыру ұсынылады. Ал жануарларды қатыгездікпен өлтіру фактілері бойынша жаза бес жылға дейін ұлғайтылуы мүмкін», – деді Еділ Жаңбыршин.

Бұдан бөлек, құқық бұзушылық құралдарын тәркілеу және болашақта жануар асырау құқығынан айыру сияқты қосымша шаралар енгізіледі. Сонымен қатар алдын алу жұмыстары күшейтіліп, ағартушылық бағыттағы шаралар қарастырылған.