Қазақстанда базалық мөлшерлеме тағы төмендеді

Қазақстан Ұлттық банкі базалық мөлшерлемені жылдық 16,75%-дан 16,25%-ға дейін төмендетті. Мөлшерлеме дәлізі ±1 пайыздық тармақ деңгейінде сақталды, деп хабарлады Ұлттық банктің баспасөз қызметі.

Ақша-кредит саясаты комитетінің шешіміне инфляцияның баяулауы, негізгі макроэкономикалық көрсеткіштердің жаңартылған бағасы және инфляциялық тәуекелдер ескерілген болжам нәтижелері негіз болған.

Тамызда Қазақстандағы жылдық инфляция 9,8%-ға дейін төмендеді. Азық-түлік бағасының жылдық өсімі 9,5%-ға, азық-түлікке жатпайтын тауарлар бойынша 11,4%-ға, қызмет көрсету саласында 8,9%-ға дейін баяулаған. Айлық инфляция 0,6% болды.

Ұлттық банк мәліметінше, халықтың алдағы бір жылға инфляциялық болжамы маусымдағы 13,4%-дан шілдеде 12,1%-ға дейін төмендеді. Нарықтың кәсіби қатысушылары жыл соңындағы инфляцияны 10% деңгейінде болжап отыр.

Ұлттық банк 2026 жылға арналған инфляция болжамын 9–11% деңгейінде өзгертпеді. Ал 2027 жылға болжам бұрынғы 5,5–7,5%-дан 6,5–8,5%-ға дейін көтерілді. Бұған сыртқы инфляцияның күшеюі, реттелетін бағаларға қатысты болжамның өзгеруі және бюджет шығыстары ықпалының артуы себеп болған.

2028 жылы инфляцияның 5% нысаналы деңгейге жақындауы күтіледі.

Ұлттық банк қазіргі инфляция мен инфляциялық болжамның оң өзгерісі базалық мөлшерлемені төмендетуге мүмкіндік бергенін атап өтті. Дегенмен бағаның өсуіне ықпал ететін тәуекелдердің күшеюіне байланысты мөлшерлемені одан әрі төмендету мүмкіндігі шектеулі екенін ескертті.

Базалық мөлшерлеме бойынша келесі жоспарлы шешім 23 қазанда жарияланады.