Қазақстанда 77 мыңнан астам медицина қызметкерінің жалақысы өседі

Қазақстанда 2027 жылғы 1 қаңтардан бастап алғашқы медициналық-санитарлық көмек жүйесінде жұмыс істейтін учаскелік қызмет мамандарының жалақысы үздіксіз еңбек өтіліне қарай 40 пайызға дейін өседі. Президент Қасым-Жомарт Тоқаев Қазақстан халқына Жолдауында Үкіметке осындай тапсырма берді.

Мемлекет басшысының айтуынша, бұл өзгеріс 77 мыңнан астам медицина қызметкерінің табысын арттыруға мүмкіндік береді.

«Үкіметке келер жылдың 1 қаңтарынан бастап осы бағытта жұмыс істейтін учаскелік қызмет мамандарының жалақысын үздіксіз еңбек өтіліне қарай 40 пайызға дейін арттыруды тапсырамын. Бұл 77 мыңнан астам маманның табысын өсіруге мүмкіндік береді», – деді Президент.

Тоқаев алғашқы медициналық-санитарлық көмек жүйесін жаңғыртуға ерекше мән берілетінін айтты. Осы мақсатта жалпы практика дәрігерлерінің өкілеттігін кеңейтіп, саланы қаржыландыру көлемін кезең-кезеңімен арттыру жоспарланып отыр.