Енді жол ережесін бұзғандарды Sergek жүйесімен жабдықталған дрондар табуы мүмкін

Астанада Sergek "ақылды" бейнебақылау жүйесімен жабдықталған пилотсыз ұшқыш аппараттар (дрондар) сынақтан өткізіліп жатыр. Бұл туралы Sergek Group компаниясы хабарлады.

Жобаны ҚР Ішкі істер министрлігі, "Қазақтелеком" және жүйе әзірлеушілері бірлесе жүзеге асырып жатыр. Сынақ аясында дрондарды әртүрлі мақсатта қолдану мүмкіндіктері тексеріледі: патрульдеуден бастап нақты мекенжай бойынша бағытталған іздеуге дейін. Жоба жол қозғалысы ережесін бұзған көліктер мен алимент берешегі бар азаматтарды жылдамырақ анықтауға мүмкіндік береді.

"Бұл – тек жедел әрекет ету емес, жол-көлік оқиғаларының алдын алу мен тәртіпті нығайтуға бағытталған құрал", – деді ҚР ІІМ Ақпараттандыру және байланыс департаментінің бастығы Сергей Варго.

Ал "Қазтелеком" басқарма төрағасы Бағдат Мүсин дрондарды қолдану аясы алдағы уақытта кеңейетінін айтты.

"Біз дрондарды қалалық бейнемониторинг жүйелеріне және орман алқаптарын өрттің ерте кезеңінде анықтау үшін бақылау жобаларына енгізіп жатырмыз. Бұл – болашағы зор бағыт", – деді ол.

Пилоттық жобаның нәтижесі оң болса, бастама өзге өңірлерде де жүзеге асырылуы мүмкін.