WBC чемпионы Карлос Адамес Жәнібек Әлімханұлын жекпе-жекке шақырып, бұрынғы допинг дауын есіне салды

Кәсіпқой бокста кезекті маңызды жекпе-жектің алғышарттары көріне бастады. Орта салмақта WBC тұжырымы бойынша әлем чемпионы, доминикандық Карлос Адамес қазақстандық боксшы Жәнібек Әлімханұлына ашық шақыру тастады. Алайда Адамес бұл хабарламасында отандық спортшының бұрынғы допингке қатысты жағдайын меңзеп, өткір пікір білдірді.

«Әй, Жәнібек, допингтік сынамаларың таза ма? Шаршы алаңға шығуға дайынсың ба? Кел, осы жекпе-жекті ұйымдастырайық», - деп жазды Адамес X әлеуметтік желісіндегі парақшасында.

Бұған дейін Доминикан Республикасының өкілі екінші орта салмаққа (76,2 келіге дейін) ауысатынын мәлімдеген болатын. Қазіргі таңда Жәнібек Әлімханұлы да осы ведомствода өнер көрсетіп, WBO рейтингінде бірінші орында тұр. Ол британдық Хамза Шираз жекпе-жектен бас тартқаннан кейін, бос тұрған чемпиондық титул үшін кездесуге міндетті үміткер ретінде қарсылас күтіп отырған еді.

Карлос Адаместің бұл мәлімдемесіне Жәнібек Әлімханұлының төңірегінде 2025 жылдың желтоқсанында болған оқиға себеп болды. Ол кезде кубалық Эрисланди Лараға қарсы үш титулды біріктіретін бәсеке алдында қазақстандық боксшының допинг-сынамасынан тыйым салынған мельдоний препараты анықталған еді.

Аталған жағдайға байланысты 2026 жылдың ақпанында WBO ұйымы тәртіптік шешім шығарған болатын. Дегенмен спорттық ұйым Жәнібекті өз жоспарларынан шығармай, тамыз айында оны екінші орта салмақтағы WBO белбеуіне басты үміткер етіп белгіледі. Осы оқиғаларды негізге алған Карлос Адамес спорттық этика шеңберінен шығып, ықтимал қарсыласына психологиялық қысым көрсетуді жөн көрген сияқты.