АҚШ-тағы қымбатшылық Трамптың рейтингін рекордтық 32 пайызға түсірді

Вашингтонды кезекті саяси дауыл шайқалтты. АҚШ президенті Дональд Трамптың халық арасындағы беделі өз саяси карьерасындағы ең төменгі деңгейге құлдилады. Reuters / Ipsos жүргізген соңғы әлеуметтік сауалнама мемлекет басшысын қолдау деңгейінің небәрі 32 пайызға дейін құлағанын көрсетті.

Ақ үй үшін ең қауіптісі - президентті өз партияластарының теріс айнала бастауы. Бұрын Трампты соңына дейін қолдайтын республикашылдардың үлесі небәрі бір аптаның ішінде 82 пайыздан 73 пайызға дейін азайып кеткен.

Жұрттың ашу-ызасын тудырған басты фактор - елдегі өмір сүру құнының шарықтауы. Қазіргі таңда америкалықтардың тек 17 пайызы ғана президенттің бағаны ауыздықтау бойынша жүргізіп отырған саясатын құптайды. Тіпти Трамптың өз жақтастары арасында да жағдай ушығып барады: республикашылдардың 51 пайызы қымбатшылыққа шыдай алмай, президентке деген өкпесін ашық білдірген.

Сарапшылар рейтингтің бұлайша күрт құлдырауын екі басты себеппен байланыстырады:

• Шарықтаған бағалар: Жанар-жағармай мен дизель отынының кенеттен қымбаттауы Конгресске өтетін аралық сайлау алдында қарапайым халықтың қалтасына ауыр соққы болып тиді.

• Ирандағы соғыс өрті: Ақпан айында Трамптың бастамасымен басталған әскери қақтығыс әлемдік энергетика нарығын шайқалтып, АҚШ ішіндегі экономикалық тұрақтылықтың тас-талқанын шығарды.

Айта кету керек, бұл - Трамптың беделіне қатысты алғашқы дабыл емес. Жақында Financial Times басылымы да Focaldata сауалнамасына сүйене отырып, президенттің қолдау деңгейі 33 пайызға дейін төмендегенін жазған болатын.