Оң жақ рөлді көліктер таксиге жіберілмейді: ІІМ бақылауды күшейтеді

Қазақстанда рөлі оң жақта орналасқан көліктердің такси қызметін көрсетуіне жол бермеу үшін бақылау күшейтілді. Ішкі істер министрлігі такси қызметін ұсынатын компанияларға осындай 70 мың көліктің тізімін жіберген. Бұл туралы Үкімет отырысында ішкі істер министрі Ержан Сәденов мәлімдеді.

Министрдің айтуынша, 2025 жылдан бастап такси қызметін ұсынатын компаниялармен цифрлық ақпарат алмасу жолға қойылған. Соның аясында жүргізушілер мен көліктер туралы мәліметтер тексеріледі.

Такси жүргізушілерінің куәлігін автоматты түрде тексеру де енгізіліп жатыр. Соның нәтижесінде жүргізуші куәлігі жоқ азаматтардың такси қызметін көрсетуіне жол берілмеуге тиіс.

Бұдан бөлек, Көлік министрлігі мен такси қызметін ұсынатын компаниялар жүргізушілердің жолға шығар алдында медициналық тексеруден өтуін және көліктердің техникалық тексеруден өткенін бақылаудың нақты тетігін әзірлемек.