Елена Рыбакина әлемнің бірінші ракеткасы атанды

Қазақстан әйелдер құрамасының көшбасшысы Елена Рыбакина спорттық карьерасында алғаш рет Әйелдер теннис қауымдастығының (WTA) әлемдік рейтингінде көш бастап, тарихи жеңіске қол жеткізді. Қазақстан Теннис федерациясының баспасөз қызметі хабарлағандай, WTA рейтингінің ресми жаңартылуы дүйсенбі, 14 қыркүйек күні өтеді.

Бұл сенсациялық нәтижеге қазақстандық теннисшінің US Open-2026 турнирінің жартылай финалына шығуы мумкіндік берді. WTA live-рейтингінде ол беларусьтік Арина Соболенконы шаң қаптырып, осылайша әлемдік топ-тізімнің жаңа көшбасшысына айналды.

Рыбакина жекелей сында әлемдік рейтингтің көшін бастаған Қазақстан тарихындағы тұңғыш спортшы атанды. Оған дейін отандық теннисшілердің ешқайсысы - ерлер арасында да, әйелдер арасында да - әлемдік теннистің ең жоғарғы сатысына көтеріле алмаған еді.

Отандық спортшының бұл тарихи жетістігіне Қазақстан Теннис федерациясының президенті Болат Өтемұратов пікір білдірді.

«Бұл жеңістің артында Еленаның және оның бүкіл командасының орасан зор еңбегі, таланты, қайсар мінезі мен көпжылдық мақсатшылдығы жатыр. Бұл - миллиондаған қазақстандықтарды біріктіретін әрі жігерлендіретін ұлы жеңіс. Бүгінгі табыс әрбір жанкүйеріміз үшін ерекше сәтке айналып, спорттағы жолын жаңадан бастап жатқан мыңдаған балаға үлгі боларына сенімдімін. Елена Қазақстан өкілінің де әлемде ең үздік бола алатынын дәлелдеді», - деп атап өтті Өтемұратов.

Қазіргі таңда Рыбакинаның қоржынында жекелей сында жеңіп алған 13 WTA титулы бар. Олардың қатарында Уимблдон (2022) мен Australian Open (2026) турнирлеріндегі жеңістері, сондай-ақ Эр-Риядта өткен WTA-2025 Қорытынды турниріндегі триумфы бар. Бұдан бөлек, қазақстандық теннисшінің еншісінде WTA 1000 санатындағы екі титул, WTA 500 санатындағы алты титул және WTA 250 деңгейіндегі екі чемпиондық атақ бар.