Жайық өзенінің суы әлі де көтеріліп жатыр

Атырау облысы бойынша жедел штаб соңғы тәулікте Жайық өзеніндегі су деңгейінің өзгергенін хабарлады.

Индербор стансасында су 25 см, Махамбет кентінде 15 см, ал Атырауда тәулігіне 5 см-ге көтеріліп, 451 см-ге жетті.

Жедел штаб су деңгейінің одан әрі көтерілуі күтілетінін қосты.

Қазақстанның сегіз облысында төтенше жағдай режимі жалғасуда.

Бұған дейін Премьер-Министр Олжас Бектенов Атырау облысына топан су келетінін, жақын күндері шарықтау шегіне жететінін айтқан болатын.