Зерттеумен айналысатын мұғалімдердің жалақысына қосымша ақы беріледі

Бүгін Сенаттың жалпы отырысында «Қазақстан Республикасының кейбір заңнамалық актілеріне ғылым және білім беру мәселелері бойынша өзгерістер мен толықтырулар енгізу туралы» Заңы мақұлданды.

Сенат Төрағасы Мәулен Әшімбаевтың айтуынша, жаңа нормалар ғалымның мәртебесін көтеруге, ғылыми қызметкерлерді ынталандыруға және талантты жастарды ғылыми қызметке тартуға бағытталған. Атап айтқанда, заң ғылыми-педагогикалық және ғылыми-зерттеу жұмыстарымен айналысатын мұғалімдердің негізгі жалақысына қосымша ақы белгілеуді көздейді. 

Мемлекеттік жоғары және жоғары оқу орнынан кейінгі білім беру ұйымдарындағы педагогтер мен және ғылыми-зерттеу жұмыстарын жүргізетін қызметкерлерге ғылыми атағы үшін 25 еселенген айлық есептік көрсеткішке дейін, сондай-ақ «профессор» ғылыми атағы үшін 50 еселенген айлық есептік көрсеткішке дейін қосымша ақы белгілеу ескерілген. Қазір бұл көрсеткіш сәйкесінше 17 және 34 АЕК деңгейінде белгіленген. Енді ғылым кандидаты дәрежесі және қауымдастырылған профессор (доцент) ғылыми атағы үшін – 93 мың теңге, ал бейіні бойынша доктор дәрежесі және профессор ғылыми атағы үшін – 185 мың теңге қосымша ақы алатын болады.

Сондай-ақ жетекші ғалымдарға ғылыми жұмыстарды аяқтау үшін ақылы шығармашылық демалыс алу құқығы қарастырылды. Олардың жоғары оқу орындарында және ғылыми ұйымдарда еңбек өтілі бес жылдан кем болмауы керек.

"Мақұлданған заң отандық ғылымды және еліміздің білім беру жүйесін одан әрі дамытуға оң септігін тигізеді деп сенеміз", – деді М. Әшімбаев.