Соңғы 10 жылда 600-ге жуық ауыл жойылып кетті

Соңғы 10 жылда ауылдық елдімекендер саны 6 838-ден 6 256 дейін, яғни 582 бірлікке қысқарды. Бұл туралы Ұлттық экономика министрі Нұрлан Байбазаров мәлімдеді.

Министрдің айтуынша, бүгінгі таңда республикамызда 6 256 ауылдық елдімекенде 7,6 млн. адам тұрады, жалпы еліміздегі халық санының 38,4%-ын құрайды. 

Табысы ең төменгі күнкөріс деңгейінен төмен ауыл халқының үлесі - 7,2%;  жұмыссыздық деңгейі - 4,7%;  өзін-өзі жұмыспен қамтығандар үлесі – 33% немесе 1,2 млн. адам.

Министрлік жыл сайын Өңірлік стандарттар талаптарына сәйкес ауылдардың қамтамасыз етілуіне мониторинг және талдау жүргізеді.

Мәселен, 2023 жылы қамтамасыз ету деңгейі 64,3%-ды құрады, ол 2022 жылмен салыстырғанда 2,1 тармаққа өсті.  Бұл ретте, объектілермен және қызметтермен қамтамасыз етілудің ең жоғары деңгейі Маңғыстау – 72,4%, Атырау – 70% және Ақтөбе облыстарында – 69,6% байқалады.  

Қамтамасыз етілу деңгейі төмен келесі облыстар: ШҚО – 58%, Ұлытау – 57% және Абай – 55,4%.