Ресей Украинаның Қазақстандағы экс-елшісіне халықаралық іздеу жариялады

Мәскеу соты Украинаның Қазақстандағы бұрынғы Төтенше және Өкілетті Елшісі Петр Врублевскийді көбірек ресейліктерді өлтіруге шақырғаннан кейін қозғалған қылмыстық іс аясында оны сырттай қамауға алуға рұқсат берді. ТАСС агенттігіне құқық қорғау органдары түсіндіргендей, украиналық дипломатқа федералды және халықаралық іздеу жарияланды.

«Алдын ала тергеу органы Ресей Федерациясы Қылмыстық кодексінің 282-бабы 2-бөлігінің «а» тармағында көзделген қылмысты (өшпенділік немесе араздық тудыру, сондай-ақ адамдық қадiр-қасиетiн қорлау) жасады деп сырттай айыпталған Петр Юрьевич Врублевскийге қатысты қылмыстық істі тергеу аясында украиндық дипломатты федералдық, одан кейiн халықаралық іздеу жариялау туралы қаулы шығарды.Сонымен қатар, Мәскеу соты тергеудің Украина азаматы Врублевскийге қатысты Ресей Федерациясының аумағына экстрадицияланған кезден бастап немесе айыпталушы Ресей Федерациясының аумағында ұсталған кезден бастап кезеңді есептей отырып, екі ай мерзімге қамауға алу туралы бұлтартпау шарасын таңдау туралы өтінішін қанағаттандырды.», - деді агенттік сұхбатшысы.

2022 жылдың тамызында Ресейдің Сыртқы істер министрлігінің ресми өкілі Мария Захарова елшінің блогер Диас Кузаировпен сұхбатының үзіндісін жариялады. Онда Врублевский Украинаның «мүмкіндігінше көп ресейліктерді өлтіруге» тырысатынын айтады. Захарова «мұны тек террористік режимнің елшісі ғана айта алады» деді. Кейінірек ол Киевтің бұл мәселеге қатысты үнсіздігін сынап, пікірдің болмауы Украина билігінің Врублевскийдің сөзін құптайтынын көрсетеді деп айтты.

2022 жылдың қазан айында Украина президенті Владимир Зеленский Врублевскийді қызметінен алып тастады.

2024 жылдың 6 ақпанында экс-елшіні экстремистер мен террористер тізіміне қосты.