«Ұмай» ипотекалық бағдарламасы бойынша өтінім қабылдаудың екінші кезеңі қашан басталады

3 қарашадан бастап «Отбасы банк» АҚ әйелдерге арналған «Ұмай» ипотекалық бағдарламасының екінші траншы шеңберінде өтінім қабылдауды ашады. Осы кезеңді қаржыландыруға 20 миллиард теңге бөлінді.

Бағдарлама шарттары бойынша заемның максималды сомасы 50 миллион теңгені құрайды, сыйақы ставкасы - жылдық 14,8% (жылдық тиімді сыйақы ставкасы - 16,3%-дан 16,8%-ға дейін). Қарыз алушы отбасының орташа айлық таза табысы 1 250 000 теңгеден аспауы тиіс және соңғы алты айдағы ресми кірісі расталуы қажет. Табыс жеткіліксіз болған жағдайда, туыстық қатысы бар-жоғына қарамастан, екі қосалқы қарыз алушыға дейін тартуға рұқсат етіледі.

Бастапқы жарнаның ең төменгі мөлшері тұрғын үй сатып алынатын аймаққа байланысты белгіленген:

• Астана және Алматы қалалары үшін - 20%-дан бастап;

• Өзге өңірлер мен қалалар үшін - 15%-дан бастап.

Бағдарлама аясында дайын бастапқы баспананы, Қазақстан тұрғын үй компаниясының кепілдігі бар немесе сақтандыру құралы қолданылатын құрылыс сатысындағы нысандарды, сондай-ақ 2016 жылдан бері салынған екінші деңгейдегі тұрғын үйлерді сатып алуға болады. Ал бастапқы нарықтағы баспана тек банкке тиесілі «Баспана Маркет» маркетплейсі арқылы таңдалады.

Жылжымайтын мүлік тікелей әйел азаматтың атына рәсімделеді. Некеде тұрған азаматшалар үшін баспана жубайлардың бірлескен мүлкі ретінде есептеледі, сондықтан кредит өтінішін тапсыру кезінде жұбайының жеке қатысуы міндетті.

Банк сарапшылары өтінім берер алдында соңғы 12 айдағы несие тарихын, зейнетақы аударымдарының тұрақтылығын, салықтық және басқа да берешектердің жоқтығын тексеруге кеңес береді.