«Халықтық құрылыс»: өңірлерде қандай нысандар салынатыны жыл соңына дейін анықталады

Қазақстанда «Халықтық құрылыс» бағдарламасы аясында жүзеге асырылатын нақты жобалардың тізімі 2026 жылдың соңына дейін жасалады. Премьер-министр Олжас Бектенов тиісті министрліктер мен әкімдіктерге өңірлердің қажеттілігін анықтауды тапсырды, деп хабарлады Үкіметтің баспасөз қызметі.

Бағдарламаға жергілікті жолдар, тұрғын үй-коммуналдық шаруашылық желілері, сондай-ақ білім беру, мәдениет және медицина нысандары кіреді.

«Мемлекет басшысы келесі жылды Жалпыхалықтық ауқымды құрылыс жылы деп жариялауды ұсынды. «Халықтық құрылыс» бағдарламасы ел тарихындағы ең ірі инфрақұрылымдық жоба болмақ. Сондықтан оны жүзеге асыру нәтижелері Үкімет пен әкімдіктердің үйлесімді жұмысына байланысты болмақ», – деді Бектенов.

Өнеркәсіп және құрылыс, Көлік, Энергетика, Денсаулық сақтау және Оқу-ағарту министрліктері әкімдіктермен бірлесіп, жыл соңына дейін әр өңірдің инфрақұрылымдық және әлеуметтік нысандарға қажеттілігін талдауы керек. Соның негізінде салынатын және жаңғыртылатын нысандардың нақты тізімі жасалады.

Құрылыс кезінде отандық материалдар мен жабдықтарға басымдық беріледі. Өнеркәсіп және құрылыс министрлігі басқа мемлекеттік органдармен бірлесіп, жобаларға қазақстандық өндірушілерді кеңінен тартуға тиіс.

Бұған дейін Президент Қасым-Жомарт Тоқаев Қазақстан халқына Жолдауында 2027 жылды Жалпыхалықтық ауқымды құрылыс жылы деп жариялауды ұсынған еді. Оның аясында өңірлердегі жол, коммуналдық желі, денсаулық сақтау, білім беру және басқа да инфрақұрылымды салу мен жаңғырту көзделеді.