Аса бай қазақстандықтарға салық қалай салынады: Үкіметке бір ай уақыт берілді

Қазақстанда аса ауқатты азаматтарға салық салудың жаңа тәсілдері әзірленеді. Премьер-министр Олжас Бектенов Ұлттық экономика және Қаржы министрліктеріне халықаралық тәжірибені зерделеп, бір ай ішінде тиісті ұсыныстар енгізуді тапсырды, деп хабарлады Үкіметтің баспасөз қызметі.

«Бөлек мәселе – ауқатты азаматтарға арналған салық мөлшерлемесі. Ұлттық экономика және Қаржы министрліктері бір ай мерзімде халықаралық тәжірибені зерделеп, аса ауқатты азаматтарға салық салу тәсілдерін енгізсін», – деді Бектенов Президент Жолдауын жүзеге асыру жөніндегі Үкімет отырысында.

Әзірге аса ауқатты азаматтарға қандай мөлшерлеме қолданылатыны және бұл санатқа кімдер кіретіні айтылған жоқ. Бұл мәселелер халықаралық тәжірибе зерттелгеннен кейін нақтылануы мүмкін.

Үкімет отырысында жаңа Салық кодексін жетілдіру мәселесі де қаралды. Ұлттық экономика министрлігіне кодекске енгізілетін нақты түзетулерді пысықтап, оларды мемлекеттік органдармен жедел келісу тапсырылды.

Қаржы министрлігіне өңірлерде салық түсімін арттыру, көлеңкелі экономика үлесін азайту және салық пен кедендік әкімшілендіруді толық цифрландыру міндеті жүктелді. Бұл жұмыста жасанды интеллект құралдары да қолданылмақ.

Сонымен бірге Үкімет инвестиция тарту жүйесін қайта қарамақ. Ұлттық экономика және Сыртқы істер министрліктеріне «Бәйтерек» холдингімен бірлесіп, он күн ішінде инвестициялық үдерістерді басқарудың бірыңғай жүйесі бойынша ұсыныс енгізу тапсырылды.

Бұдан бөлек, бір ай ішінде терең өңдеуге бағытталған инвестициялық жобалардың нақты тізімі жасалуға тиіс. Әр жоба бойынша әлеуетті инвесторлар, жүзеге асыру мерзімі, өндірістің жергілікті үлесі және экономикалық тиімділігі айқындалады.