Қазақстанда мұғалімдер тапсыратын есептердің саны қысқарады

Қазақстанда мұғалімдерден талап етілетін есептердің барлық түрі қайта қаралып, әртүрлі жүйелерде қайталанатын есептер жойылады. Премьер-министр Олжас Бектенов Оқу-ағарту министрлігі мен әкімдерге педагогтердің әкімшілік жүктемесін азайтуды тапсырды, деп хабарлады Үкіметтің баспасөз қызметі.

«Балаларды оқыту мен тәрбиелеу тиімділігін арттыру, мұғалімдердің қызметіндегі артық жүктемені азайту және олардың беделін қорғау үшін Оқу-ағарту министрлігіне әкімдермен бірлесіп, есептіліктің барлық түрін қайта қарауды тапсырамын. Олардың әртүрлі платформаларда қайталануын жойып, есептер санын азайту қажет», – деді Бектенов.

Сонымен қатар Оқу-ағарту министрлігі 10 желтоқсанға дейін мұғалімдердің ар-намысы мен қадір-қасиетін қорғау шараларын күшейту жөнінде ұсыныстар енгізуге тиіс.

Бұл тапсырмалар Президент Қасым-Жомарт Тоқаевтың 2026 жылғы Жолдауында көтерілген мәселелерді жүзеге асыру аясында берілді. Мемлекет басшысы мұғалімдердің негізгі міндеті балаға сапалы білім мен тәрбие беру екенін айтып, оларды артық жұмыстан босату қажеттігіне назар аударған еді.

Үкімет отырысында инклюзивті білім беру мәселесі де қаралды. Оқу-ағарту, Ұлттық экономика және Қаржы министрліктеріне, сондай-ақ өңір әкімдеріне Инфрақұрылымдық даму қоры арқылы салынатын жобалар қатарына оңалту және сауықтыру кабинеттерімен жабдықталған жаңа үлгідегі 20 инклюзивті мектепті енгізу тапсырылды.

Бұдан бөлек, ерекше қажеттіліктері бар балалармен жұмыс істейтін мамандар тапшылығын азайту және балаларға ерте кезеңде тиімді диагностика жүргізу жөнінде жүйелі шаралар әзірленбек.