Қазақстанда жаңа кезең басталады: Ең төменгі жалақы өсіп, тексерулерге мораторий қойылады

Бүгін Үкімет отырысында Президенттің «Қазақстанның жаңа тарихи кезеңдегі өзекті міндеттері» атты Қазақстан халқына Жолдауын жүзеге асыруға бағытталған ауқымды шаралар кешені таныстырылды. Ұлттық экономика вице-министрі Азамат Әмрин ел экономикасын дамытудың 2027 жылға арналған негізгі жоспарларын баяндады.

Жиында қабылданған шешімдерге сәйкес, 2027 жылғы 1 қаңтардан бастап елдегі ең төменгі жалақы мөлшері 110 мың теңгеге дейін ұлғайтылады. Бұл қадам халықтың нақты табысын арттырып, экономиканың орнықты әрі сапалы өсуін қамтамасыз етуге тиіс. Сонымен қатар инфляцияны төмендету мақсатында баға белгілеу мен тарифтік саясатты қадағалау шаралары күшейтіледі.

Кәсіпкерлік саласын қолдау бағытында маңызды бастамалар көтерілді. Атап айтқанда, микро және шағын кәсіпкерлік субъектілерін тексеруге және профилактикалық бақылауға үш жылдық мораторий енгізу мәселесі қарастырылуда. Бұдан бөлек, бизнесті ұзақ мерзімді қаржыландыру, технологиялық жаңғырту және мемлекеттік сатып алуларға белсенді түрде тарту тетіктерін қамтитын Орта бизнесті дамыту жоспары әзірленеді.

Салық саясаты шеңберінде бизнес-қоғамдастықтың ұсыныстары ескеріліп, Салық кодексіне ішінара өзгерістер пакеті дайындалды. Халықаралық тәжірибеге сүйене отырып, ірі капитал иелері үшін жоғарылатылған салық мөлшерлемесін енгізу мәселесі де назарда болмақ.

Сондай-ақ Жолдауда көрсетілген инфрақұрылымның «ауқымды құрылысы» бағытын жүзеге асыру мақсатында арнайы Инфрақұрылымдық даму қоры құрылғаны хабарланды.