Оңтүстік Кореяда ит етін жеуге тыйым салынды

Оңтүстік Кореяда ит өсіруге, союға және тағам ретінде сатуға тыйым салынды. Тәртіпті бұзған адам 3 жылға бас бостандығынан айырылуы немесе 22,5 мың доллар айыппұл төлеуі мүмкін. Бірақ ит етінен тамақ пісіретін мейрамханалар заңды орындауға асықпай отыр. 

Аталған заң 2027 жылы күшіне енеді. Сондықтан әзірге ит етінен тағам дайындайтын мекемелер жұмыс істеп жатыр. 

Заң жобасы былтыр қаралып, ел президентінің қол қоюына ұсынылған. Енді заң мемлекет басшысы Юн Сок Ел мен Министрлер кабинеті қол қойғаннан кейін қолданылады. Содан кейін өз қызметін өзгертуге немесе тоқтатуға мәжбүр болатын кәсіпорындарға Үкімет қаржылай қолдау көрсетпек.

Соңғы дерекке қарағанда, Кореяда ит өсіретін 3 500-ге жуық ферма тіркелген. Олар елдегі 3 мыңға жуық мейрамхананы ит етімен қамтамасыз еткен.

Былтыр жүргізілген сауалнамаға сәйкес, елде ересек адамдардың 64 пайызы иттің етін жеу дұрыс емес деп санаған.

Оңтүстік Кореяда ит етін тұтынуға тыйым салу туралы алғаш рет 1988 жылы айтыла бастады. Олимпиада ойындары кезінде Сеул мэрі мұндай тағамдарды дайындайтын мекемелерді жабу туралы бұйрық шығарды. Ит союға тыйым салу туралы көп жылдар бойы айтып келе жатқанымен, қазіргі президент Юн Сок Ёль сайлау науқаны кезінде мұндай норманы енгізуге уәде еткен.

Ал Қазақстанда әрбір жануарды жеуге рұқсат беретін нақты заң болмағанмен, арнайы санитарлық норма бар. Ит-мысық сою фактілері де Қылмыстық кодекстің 316-бабы («Жануарларға қатыгездікпен қарау») бойынша қаралады. Бұл ретте тамақтану орындарына ит сойып сатып жүрген ақмолалықтан 1 тоннадай ет тәркіленгенін айта кеткен жөн. Сондай-ақ Алматы облысында ит соятын орын табылған болатын.