"Наурыз" тұрғын үй бағдарламасына бір күнде 3 мыңнан астам өтініш түсті

Осы уақытқа дейін орта есеппен сағатына 400 өтінім қабылданып, өңделген. (Өтінім жұмыс күндері сағат 9.00-ден 21.00-ге дейін қабылданады).

«Алғашқы күннің қорытындысы бойынша барлығы 3 347 өтінім түсті. Тұрғын үйі бар және депозитінде қажетті сома жиналмаған (1 млн теңге) азаматтардың өтінімі кері қайтарылды. Нәтижесінде 1 124 өтінім сәтті қабылданды, олардың жартысы тұрғын үй кезегінде тұрған халықтың әлеуметтік осал тобына жатады», - делінген хабарламада.

Сондай-ақ, банктен салымшылар депозитін асықпай толықтырып, қажет болған жағдайда оны туыстарының депозиттерімен біріктіріп, бағдарламаның шарттарына сай өтінім беруге болатыны айтылды.

«Өтінімдерді қабылдау аяқталған соң саралау басталады. Бағдарламаға қатысушылар тізіміне ең көп ұпай жинаған үміткерлер кіреді. Қатысушыларды дүрліктірмеу үшін өтінімдерді қабылдау мерзімі барынша ұзартылды (25 сәуір - 30 маусым). Тағы бір жайт, өтінім беру күні мен уақыты ұпай санағанда ескерілмейді», - деп түсіндірілген ресми ақпаратта.

Айта кетейік, 25 сәуірде «Наурыз» тұрғын үй бағдарламасына өтінім қабылдау басталды.

«Наурыз» ипотекасының басқа тұрғын үй бағдарламаларынан басты айырмашылығы – салымшының депозит (Отбасы банкіндегі депозит) мерзіміне қарамайды, яғни бүгін депозит ашып, ертең бағдарламаға қатысуға болады. Бірақ депозитте кем дегенде 1 млн теңге болуы тиіс. Тағы бір талап қатысушы мен оның отбасы мүшелерінің атында соңғы 5 жыл ішінде жылжымайтын мүлік (тұрғын үй, жер телімі тағы сол сияқты) болмауы қажет.

Несие мерзімі – 19 жыл (20%). Тағы бір айта кететін жайт, тұрғын үй кезегінде тұрған азаматтарға несие 7%, ал кезекте тұрмағандарға 9% беріледі. Тұрғын үй бағдарламасына 18-62 жас аралығындағы Қазақстан азаматы қатыса алады. Сондай-ақ, қатысушы «Отбасы банкінде» депозиті бар салымшы болуы және табыс көзін растауы міндетті.