Мбаппе «Реал Мадрид» клубына қашан ауысады және нешінші нөмірмен ойнайды?

«Реал Мадрид» пен ПСЖ биылғы маусымда Еуропа Чемпиондар лигасында кездеспейтіні белгілі болған кезде ғана келісім жасалады. Әзірге қос команда да жарыста ойнап жатыр және теориялық тұрғыдан кез келген кезеңде бір-бірімен кездесіп қалуы мүмкін. Бұл туралы ВВС хабарлады.

Килиан Мбаппенің «Реал Мадрид» клубына ауысуы әлемдік БАҚ беттерінің негізгі тақырыбына айналды. Жанкүйерлер де тезірек осы трансфердің жүзеге асуын тағатсыздана күтіп жүр. 

Айта кету керек, «Реал Мадрид» Мбаппеге еркін агент ретінде келісімшартқа отырғаны үшін бонус ретінде 150 миллион еуро төлейді. Ойыншы бұл соманы 5 жыл ішінде бөліп алады. Оның «Реалдағы» негізгі жалақысы 15 миллион еуроны құрайды. Сонымен қатар, Француз ойыншысының мадридтік клубпен келісімшарты 2029 жылдың жазына дейін болатыны белгілі болды. Ал, Мбаппенің Реал Мадрид клубында қандай нөмірмен ойнайтынына келсек, бұл тұрғыда көпшіліктің пайымы дөп келді. Яғни, ол 10 нөмірде ойнайды. Бұл туралы «Мундо Депортиво» хабарлаған еді.

Ақпаратқа сәйкес, қазір бұл нөмірде хорватиялық футболшы Лука Модрич ойнағанымен, Лука жазда Мадридтен кетуі әбден мүмкін. Ал француз ойыншысы 10 нөмірдің жаңа иесі болады. Мбаппе ПСЖ сапында 7-ші нөмірде өнер көрсетіп жүр. Алайда, «Реалда» бұл нөмір Винисиусқа тиесілі. Винисиус «Реалдан» кеткенде немесе Мбаппеге өз еркімен бергісі келгенде, Киллиан 7 нөміріне ие бола алатыны айтылған еді.