Келер жылдан бастап елімізде ең төменгі жалақы мөлшері өседі

2026 жылдың 1 қаңтарынан бастап Қазақстанда ең төменгі жалақы мөлшері артады. Бұл туралы Еңбек және халықты әлеуметтік қорғау министрі Светлана Жақыпова Үкімет отырысынан кейін журналистерге мәлімдеді.

Министрдің айтуынша, қазір бірнеше институт ең төменгі жалақыны есептеу үшін негіз болатын зерттеулер жүргізіп жатыр. 2024 жылы еңбек өнімділігі, медианалық жалақы мен инфляция деңгейін ескере отырып, ең төменгі жалақыны есептеу әдістемесі бекітілген.

«Қазіргі уақытта бірнеше институт еңбек өнімділігі, аймақтар мен салалар бөлінісіндегі медианалық жалақы бойынша нақты көрсеткіштерді анықтау бағытында зерттеу жүргізіп жатыр. Осы мәліметтер ең төменгі жалақы мөлшерін есептеу негізіне айналады», – деді министр.

Светлана Жақыпованың сөзінше, бұл зерттеулер жыл соңына дейін аяқталып, 2026 жылдың 1 қаңтарынан бастап ең төменгі жалақыны арттыруға мүмкіндік береді.

Айта кетейік, қазіргі таңда Қазақстандағы ең төменгі жалақы мөлшері – 85 мың теңге.

Түсініктеме:

• Еңбек өнімділігі – белгілі бір уақыт ішінде қызметкердің немесе кәсіпорынның өндірген өнім көлемі. Яғни, жұмыстың тиімділігі мен нәтижелілігін көрсететін көрсеткіш.

• Медианалық жалақы – барлық жұмысшының жалақысын ең төменнен ең жоғарыға дейін тізіп шыққанда, ортасында тұрған адамның жалақысы. Бұл орташа жалақыдан ерекшеленеді және нақты жағдайды дәлірек көрсетеді.

• Инфляция – тауарлар мен қызметтердің жалпы бағасының өсуі. Ол халықтың сатып алу қабілетіне тікелей әсер етеді.