Қазақстанда қоғамдық орында бет бүркеуге тыйым салынды

2025 жылғы 30 маусымда Қазақстан Президенті Қасым-Жомарт Тоқаев қоғамдық орындарда адамның бет-жүзін тануға кедергі келтіретін киімдерді киюге тыйым салатын заңға қол қойды. Бұл тыйым мұсылман әйелдерінің жүзін жауып тұратын киімі – ниқабқа да қатысты болады.

Заң мәтінінде көрсетілгендей, кейбір жағдайларда бетті жабуға рұқсат беріледі. Атап айтқанда, қызметтік міндеттерді орындау, медициналық себептер, қолайсыз күн райынан қорғану, азаматтық қорғаныс мақсатында немесе спорттық, мәдени-бұқаралық іс-шараларға қатысу жағдайларында рұқсат етіледі.

Бұған дейін Мемлекет басшысы бетті толық жабатын киімдердің орнына ұлттық болмысты айшықтайтын киім киюді қолдайтынын айтқан еді.

Айта кетейік, ниқаб пен пәренжі секілді бет-жүзді тұтас жабатын діни киімдерді қоғамдық орындарда киюге Еуропа одағына мүше бірнеше елде, соның ішінде Франция, Дания және Нидерландыда, сондай-ақ Шри-Ланкада тыйым салған. Биыл қаңтарда мұндай заңды Қырғызстан қабылдады. Бұған дейін ұқсас тыйым Өзбекстан мен Тәжікстанда да енгізілген.