Қазақстанда алғаш рет ұшақ бортында жоғары жылдамдықты интернет іске қосылды

2026 жылғы 29 қазанда Алматыдан Ташкентке бағыт алған Air Astana әуе компаниясының ұшағында тұңғыш рет жоғары жылдамдықты спутниктік интернет жүйесі сәтті іске қосылды. Бұл туралы Қазақстан Республикасы Жасанды интеллект және цифрлық даму министрлігі мәлімдеді.

Жоғары жылдамдықты Wi-Fi жүйесімен EI-KGB тіркеу нөмірі бар Airbus A321LR әуе кемесі жабдықталды. Жоба SES халықаралық спутниктік байланыс провайдерімен серіктестікте жүзеге асырылып жатыр. Авиациялық техникалық жабдықты орнату жұмыстарын әуе компаниясының өз мамандары өзіндік өндірістік базасында орындады.

Бұл бастама Мемлекет басшысы Қасым-Жомарт Тоқаев жариялаған Цифрландыру және жасанды интеллект жылы аясында жүзеге асырылуда. Жобаны өмірге енгізу үшін Жасанды интеллект және цифрлық даму министрлігі заңнамалық базаға өзгерістер енгізіп, геостационарлық емес спутник жүйелерін қолдануға қатысты регуляторлық кедергілерді жойды.

Премьер-министрдің орынбасары – Жасанды интеллект және цифрлық даму министрі Жаслан Мәдиевтің айтуынша, атқарылған ауқымды дайындық жұмыстары мен халықаралық операторлармен жасалған келісімдер ел тұрғындарының сапар кезінде үздіксіз байланыста болуына мүмкіндік береді. Спутниктік интернет желісі алдағы уақытта әуе және теміржол көліктерінде одан әрі кеңейтіледі.

Интернетті қолдану тәртібіне сәйкес, 2027 жылғы 31 қаңтарға дейін созылатын промо-кезеңде барлық жолаушыларға тегін байланыс беріледі. Ал 2027 жылғы 1 ақпаннан бастап тегін Wi-Fi қызметі бизнес-класс жолаушылары мен Nomad Club бағдарламасының Gold және Diamond статус иелеріне ұсынылады. Бағдарламаның басқа деңгейдегі мүшелері мессенджерлерді тегін пайдалана алады, ал қалған жолаушылар үшін арнайы интернет-пакеттер қарастырылған.