Қазақ тілін қаншалықты білетінін көрсетуі тиіс: Оқушылар жаппай емтихан тапсырады

Бұған дейін тек 9 және 11-сынып оқушылары қазақ тілінен емтихан тапсыратын.

Енді олардың қатарына орта буынның бесінші, алтыншы, жетінші, сегізінші сыныптары мен жоғары буынның оныншы сыныбы қосылды.

Осылайша оқушылар қазақ тілін қаншалықты білетіні тексерілетін болады.

Орта білім комитетінің бас сарапшысы Гүлсила Мұздыбекованың айтуынша, бұл сынақтың мақсаты – оқушылардың  тілді меңгеру деңгейін бағалау ғана емес, оқушыларымыздың оқу сауаттылығын дамыту және тілді үйренуге ынталандыру.

"Емтихан қорытынды бағаларға әсер етеді. «Алтын белгіге» үміткерлер осы аралық емтиханнан 4 деген баға алып қалса, әрі қарай үміткер бола алмайды", – деді ол 24kz-ке.

Емтихан уақытын мектеп әкімшілігі белгілейді. Ол ауызша және жазбаша өтіп, оқушының қазақ тілінде оқу, жазу, тыңдау мен сөйлеу дағдыларын анықтайды. Емтихан тапсырмаларын сыныптың оқу бағдарламасын негізге ала отырып мұғалімдер дайындайды.

Емтиханды қазақ тілінде оқытатын мектеп тек «қазақ тілі бойынша тапсырса, ал қазақ тілінен басқа тілде оқытатын мектептер «қазақ тілі және әдебиеті» бойынша тапсырады. Ал сынақтан сүрінген оқушыға екінші мүмкіндік беріледі.